يا سلام لو تصفى لى الدنيا من بعد الماسى

اصلى ظمان داير اشرب منك اروى وتانى اشرب بى كفوفك
جيت اشوف بستان هوانا وداير اشوف خضرة جروفك
هل ذبل زهرك فى بعدى واللا ازدانت قطوفك
لا كتبت وراك رسائل ولا قريت بعد حروفك
لا قصيد بعدك قصدتو ولا عزفت بعد عزوفك
لا الربيع بعدك غشانى ولا الورود ورتنى فيها
ولا الرياض بسمت عشانى ولا الجمال الشفتى فيها
وراك ضيعت الامانى وغيرى ما بكى زول عليها
لا دريبه عرفتو تانى ولا رجعت وفزت بيها
حتى توب صبرى المقطع بى وراك كملتو كلو
الا عرضى بقالى مقنع وريدى عازل ما وصلو
وين حقولك فيها ارتع وفى هواك الشوق ابلو
وبى حنانك يبقى منبع منو اشرب ما بملو
وين صباحاتك تغرد فيها اسراب القمارى
وين غماماتك بترعد تروى جواى الصحارى
وين زهيراتك تفرهد تانى فى ساعة العصارى
وين نسيماتك تعربد تلهو ترقص فى خدارى
يا سلام لو تصفى لى الدنيا من بعد الماسى
ابقى جنبك يا بنية فى الصباحات والاماسى
احكى ليك وتحكى لى عن ليالينا القواسى
نمسح الدمعة الروية ونبنى دنيا بلا مراسى