ما تخافي دي الايام انا طالما جنبك

ما تخافي دي الايام انا طالما جنبك
ما دام بقيتي الروح حافضل كدة احبك
**********
ما تخافى من اقدار فى يوم تفرقنا
او جمرة من أي نار في مرة تحرقنا
لا زمنا لا المشوار الخايفة يسرقنا
من ريدنا حتى الموت ما هو فارقنا
********
حتى ان وقفنا على اعتاب مهالكنا
وشفنا الزمن بهدم كان روحنا وممالكنا
ما تخافي مهما كان وعرة مسالكنا
ما طال مافى انسان فى الدنيا مالكنا
*************
كل الحكاية زمن يا روحي ما اكتر
بطراكي في الاحلام بطيفك اتصبر
جاييك آه وانكان احيان يتعثر
والحال شوية شوية يا غالية بدبر
**********
يمكن زمنا كتير مرات بيظلمنا
لكنودون ما نحس نلقاهو بعلمنا
زي ما بحن مرات مرات بألمنا
طبعو الشتات وايام يسخى بيلملمنا
**************
بي غفلة الايام الجاية رسلي لي
فلا تزعجك اوهام ما طالا نبضك حي
نومي واكيد في النوم يوماتي بتحلمي بي
موعدنا آخر العالم ويمكن اقل شوي
**********
ان ما وصل عينيك انا اصلو ما برتاح
خليني فى الجاي سيبيني من الراح
مرحب بكل الشوق الجاي لي يجتاح
يرميني في حضنك الدافي بالافراح
**********
انا اصلى ما طمعان غير اني القاكي
واسكن معاكي فى عش يبقى لي دنياكي
واقعد قصاد عينيك واهواكي واهواكي
لامن اموت بالريد وانزف واياكي
***********
راجيه بفارق الصبر يوما يكون عيدي
واوفي القطعتها ليك والكان مواعيدي
دليهو غصن الريدكل ما يميد ميدي
واتخيلي الايام وايديكي في ايدي
**********
ما تخافي من مجهول اصلي ما اتخلق ليكي
معليش اذا سنوات ما قدرت الم فيكي
انا في امان ما دام شايلاني عينيكي
وانتي اطمئني كمان انا مطمئن بيكي