وداعاً يا صدق أحباب وداعاً يا زمن دغري

إذا المحبوب هجر دربك وترك حلم الليالي هموم
أقيف وأدّي العجب ربّك بين قلبا وَفي ومكلوم
وبين الشاف علي بابك وفاك وإخلاصك المعلوم
بشاشتك وحسن ترحابك وغرس فيك خنجرو المسموم

ملاذك يا عشا البايتات شرق يوم شاف هواك غرّب
وقف حين حسّ فيك ممات يدب في أوصالك إتسرّب
ضحك ضحّك عليك شُمّات وما همّـــاهو تتعذّب
وإنت الّليهو كان هيهات معينك من حنان ينضب

مين يقدر قبل ما تروح يا قلب الوفى المعهود
يكسي رميم مُناك الروح في رِمس الهوى الموأود
ووين برقا يضوّي يلوح علي رحم الليالي السود
متين عبق الأماني يفوح يقالد للسّلام عنقود

إريتك والزمن دولاب تبتّو مصيرو من بدري
تملّي علي الخلوق تنساب صبابات الهوى العُزري
وعليك يوت غيمك الكضّاب مباري رياض مناك تاري
وداعاً يا صدق أحباب وداعاً يا زمن دغري