داير اعرف...

داير اعرف...
ايه علاقة القمره بيك....
والنسيم يا ربي منك ....
او قريبك و الاّ اخوكي....
وهل حقيقه....
انو زي ما قالو عنك....
جاكي يوم الليل مفرهد....
يستلف منك ضفايرو..
ومن سواد شعرك.. سوادو...
شان يزّين امسياتو....
وهل صحيح يا انتي مره....
لما يوم الورد فتح....
جاكي يستجديك نضارتو....
ومن خديدك شال نداوتو....
وهل صحيح...يا انتي مره....
قالو انو ..
عندليب الجنه جاكي...
خلي صوتو وشالو صوتك....
شان يغرد اغنياتو...
وقالو برضو ...
انو يوم شمسنا جاتك...
تستلف من لون شفايفك...
لون مغيبها....
شان تودع بيهو حبيبها...
بي دموعها وبي نحيبها...
وهل حقيقه...
انو مره نيلنا ذاتو...
جاكي شال ...
نبضات قليبك...
شان يطـّول لي حياتو....
نبضه ....نبضه...
وكل نبضه... بتبقي صفقه...
صفقه من موجو الحِنـّين...
يوم يردد اغنياتو...
ويبقي عايش ذكرياتو....
والشمس تنزل تراقص..
والنخيل شال من قوامك...
يبدا يتمايل يبـّشر...
ياسلام يا انتي قالو....
كل شي في الدنيا منك...
القمر من نور جبينك...
والشمس من نار قليبك...
حتي ليلنا شال سوداو....
من سبيبك...
وكل جمال الكون قريبك...
ياسلام يا انتي قالو...
كل شي في الدنيا منك...