وهم القوافي للشاعر مؤيد الامين

وهم القوافي

متمني .. مستني الفرج
القمره لوكان في السما
وفي الارض
ها ك ياحبل وهم القوافي
المنعرج
شيليها من غلب الغلابه
ومن عرق دقن الدراويش العرج
شيليها اوعك تنحرج
خليها تفرح وتبتهج
قوليها من شعري الحزين
تعدل قوافيه العوج
اسأل عن الفر السرق
رمل الطريق
وداهو وين؟
وعن الغول الشرب
موية البحر وداها وين ؟
من حصان ود النمير
شال السرج
اسأل عن الوطن الصبح منفى
دراويشاً تهج وترج
قوليها اوعك تنحرج
قوليها من شعري الحزين
خليها تفرح وتبتهج
..
قوليها عن اصل القصيد
احكيله عن قصة ملكنا
الساقنا في الاخر عبيد
متعنا بالخوف والالم
شبعنا في الجوع الشديد
فرحنا بى الهم والوهم
كان بيصدق في الكذب
كان بيخلف في الوعيد
شيليها من شعري الحزين
قوليها اوعك تنحرج
خليها تفرح تبتهج
اسأل واما ترجى الجواب
ارويله وريها الحصل
قليها بى لهجة عتاب
كيف الامل في لحظة خاب
ليه بنتفارق صحاب
حتى البحر سوالو باب
الشمس غطاها الضباب
الحرقة صبحت لينا زاد
الفرحه في حالة غياب
الضلمه مسكن لى الضعيف
الخوف سكن في كل باب
الغول شرب موية المطر
كيف نزرع الارض اليباب
اسأل وماترجى الجواب
قول ليها من شعري الحزين
خليها تفرح تبتهج
متمني مستني الفرج
حجيها بى القصص الزمان
قصة جّرب ضنب الجمل
جاري ويجرب كان يطير
يسكن مداين في السحاب
وقصة جراب رجب
اجرف خير البوادي
وفتح شبابيك لى الذئاب
سجن الطيور
حتى الصقير صابر يصاقر
في الغراب
يشرب من المرّ يرتوي
ياكل من الصمت العزاب
قول ليها اوعك تنحرج
شيليها من شعري الحزين
خليها تفرح وتبتهج
مظلومه زينا ياخلق
مجدوعه في نص السماء
يارب اديها الفرح
واهديها من الخير كتير
واديها من نورك وهج